Nieuwsbrief in het Zeeuws - mei 2024

Zitterdaegen 11 en 12 meie 11.00 – 17.00 uur
Open mirregen voe de tentoanstellieng “Mijn vlakke(n) land” van Helma Hulscher.
In saemenwerkieng mie Kunstspeuren in de Zak.
Eur schilderieën begunne mie ‘n foto van ‘n landschap, mè a werkend wor die foto los’elaete en gae vurm, kleure en verve ‘n eigen leven lieë.
Ze ei ‘n voorkeur ontwikkeld voe landschappen, omda die d’r ‘t meêste lene om uit’edocht te worren toet composities van kleurvlakken en lijnen, om toet ‘n vurmelijke vertaling van ‘n onderwerp te kommen.
Eêlemille abstract worre d’r werken nie; d’r bluuf naebie aoltied ‘n terugkieken nì de werkelijk’eid.

Zondag 26 meie 14.30 uur Presentatie Genesis in ’t Zeêuws

Een nieuw deêl in de serie de Biebel in ’t Zeêuws.

Genesis is ‘t eêste boek van de Biebel, ‘t begun dus. Over oe aolles wat bestit d’r ‘ekommen is. Over Adam en Eva, Noach, Abraham en Sara, Izak en Jakob, Jozef, en aol de mènsen die di nae kwamme. Aol die mènsen bin eigelijk net as oans.

De Walcherse vertaalgroep van ’t Kerkje ei t’r lank an ‘ewerkt om de moaie verhalen in goed Zeêuws te vertalen. Noe kan ‘t eêste boek uut’egeve worre.
Classispredikant domenie Arie van der Maas za dat in ontvangst neme.
Bie de presentatie worre d’r stikjes uut Genesis ‘eleze en litte me de têkeniengen van Jopie Minnaard zië. Zie ei die ok voe dit  boek ‘emikt.
Da Capo, dat a bestit uut Renske Breeman (harp) en Cisca Zuurveld (dwarsfluit), zurg voe meziek die a past bie de verhalen.

Kom mè luustere en mee geniete.

Genesis in ’t Zeeuws is nae de presentatie te koôp in ’t Kerkje en in de boekandel.
Pries € 15,00, pinnen kan ok in ‘t Kerkje.

Toegang voe niks, wè graag reservere bie: reservering@kerkje-ellesdiek.nl of 0113-612681.

Aolle zitterdaegen en zondaegen van 18 meie tot 21 juli 13.30 – 16.00 uur
Zummertentoanstelling “Zee-Land” van Toon Capello en Diana Stevens
‘T werk van Diana Stevens volg de schaeduw en ‘t ritme van aèrde en waeter. Wind, weer en golven maeke dit vluchtige beeld toet ‘n rieke bron van inspiratie.
Gin mèns weet dat zo vast te leggen as Diana Stevens. Ze doe dit mie olieverve en acryl op linnen in verschillende groates.
Toon Capello mikt a vee jaèren bienae aoltied pentekeniengen. Dikkels landschappen mie biezondere bômen, waetertjes, soms ‘n paèr koeien. Laege horizonnen en nooit wolken in de lucht.
De leste jaèren è ok kleur um te pakken ‘ekrege. Ie mikt noe regelmatig ‘n uutstapje ni pastel, aquarel en acrylverve.

2024 – Uutbreidieng geluudsinstallatie

Toet noe toe most bie vee voorstelliengen geluudsapparatuur  ‘eleend worre bie bevriende geluudstechnici. Noe is dat nie mi noadig. ’t Kerkje ei d’r eigen geluudssysteem uut kunne breie mie onder meêr extra zangmicrofoons, speakers en monitoren.
De installatie is noe geschikt voe bienae aolle voorstelliengen.

Financieel wier dit meugelijk mie giften van ‘t Cultuurfonds en de Frits Lensvelt Stichtieng, actie Rabo Club Support en een gift van ‘n bezoeker.
’t Kerkje bedankt iedereên divoe.