Zitterdag 4 jannewari 2025 14.30 uur
Openieng tentoanstellieng “Een leven lang water” mie werk van Ad Beaufort.
Kom kieke ni de kunst, luustere ni de meziek, mie ‘n drankje en ‘n hapje.
Toegang is vrie

Zondag 5 jannewari 14.30 uur
Nieuwjaarsconcert ‘t Veerse Scheepstuug.
UUTVERKOCHT
Shantykoor ‘t Veerse Scheepstuug verzurg wee ‘t traditionele Nieuwjaèrsconcert in ’t Kerkje van Ellesdiek.
Onder leidieng van dirigent Moritz Benschop sti dit koor ieder jaèr garant voe ‘n moai verzurgd en ofwisselend programma.
In de pauze de gebrukelijke verlotieng en nae ofloôp voe zowel ‘t koor as voe aolle bezoekers ’n drankje voe niks en ‘n toast op ‘t nieuwe jaèr.
Toegang  € 9,--

Zitterdaegen 11 en 25 jannewari, 8, 15 en 22 febrewari 13.30 tot 16.00 uur
Open mirregen voe de tentoanstellieng  “Een leven lang water” mie werk van Ad Beaufort.
Vee van ‘t werk van um is ‘emikt in olieverve, mè ie mikt ok têkeniengen mie contékriet en pastel.
Deze tentoanstellieng bestit uit ‘n deêl van de werken die â t’n in z’n Zeêuwse pelgrimage ‘emikt eit.

Zondag 19 jannewari 14.30 uur
Back to the sixties mie Cosy Time
De Zeêuws-Vlaemse band Cosy Time brieng de muzikale sfeer van de jaèren ’60 trug.

‘n Mirreg vol echte muzikale nostalgie.

Cosy Time is ‘n band die â voraol meziek uut de (leste) vuuftiger en zestiger jaèren briengt.

Naebie aolle leden van de 4-koppige band è de roerige sixties zelf ok bewust mee’emikt as muzikant en brienge ’n breêd repertoire: Beatles, Bee Gees, Eagles, The Shadows, ZZ en de Maskers, Tom Jones, Stones, Creedence Clearwater; aolle sterren uut die tied komme langs.

De band bestit uut Diederick Benjaminsz, Carl Boeijkens, Rob Joling en Carlos Hoogwijk. 
Geluud : Jos Calbo.

Toegang € 9,--
Reservere bie reservering@kerkje-ellesdiek.nl of belle nî 0113-612681.

Zondag 2 februari 14.30 uur
Van Gregoriaans toet Gospel

In ‘n biezondere voorstellieng wor ‘n muzikale reize ‘emikt deur de liturgische kerkmeziek.
De enorme riekdom van de christelijke meziekgeschiedenis kom in aol z’n kleuren en schakeriengen an bod.

Van verstilde Gregoriaanse gezangen nî tiedlaoze, klassieke werken zô as ‘t Ave Maria. Van liederen van Huub Oosterhuis nî ‘t gezongen gebed uut het Taizé gedachtegoed. Van Nederlandstalige psalmen nî swiengende Amerikaanse gospel.

‘n Keur an muzikanten werkt mee an deze biezondere voorstellieng zô as dirigent/organist Christian Blaha, Gregoriaans mannenkoor St. Caecilia, Hanneke de Vroe, Marsha de Nooijer en Stoffel Biesterbosch.

Rens Stobbelaar presenteert de voorstellieng en is de gids op deze muzikale reize.

Toegang € 9,--
Reservere bie reservering@kerkje-ellesdiek.nl of belle nî 0113-612681.

Verdrietig bericht

Maendag 16 december is Clasien Rooze-Stouthamer ‘esturve.
Me zagge d’r nog bie de presentatie van ‘t boekje ‘Wat a m’n moeder aoltied zei’ op 10 november.
Clasien is ‘uut d’n tied’, zô as ze zelf in d’r geliefde moedertaal zou zegge.
In die taal en in geschiedenis was ze deskundig. Die deskundigheid ei ze aoltied in’ezet als stille kracht in ’t Kerkje van Ellesdiek. As lid van de vertaalgroep, as lid van de werkgroep levensbeschouwieng, as organist en as gastvrouwe.
Voe ‘t bovengenoemde boekje ei ze mie d’r kenmerkende precisie de tekst nog nae’ekeke. Wat moai dâ ze nog bie de ingebruuknemieng van ‘t pas gerestaureerde urgel kon weze.
Dat Clasien d’r bie kon weze, ondanks toenemende beperkiengen, kwam deur de groate zurgzaem’eid en inventiviteit van d’r man Joop. En deur d’r eigen grenzeloas optimisme. Je oart ‘t eur zô zegge: ’t Kom aol goed.’
Clasien was ‘n bewonderenswaerdig voorbeeld. Wat zâ ze ‘emist worre.
Maendag 23 december was de begraefenisse, natuurlijk vanuut ’t Kerkje van Ellesdiek.